ကျေးလက်လမ်းများ ဖွံ့ဖြိုးရေးဆိုင်ရာ မဟာဗျူဟာကို ၂၀၁၇ မတ်လမှာ အပြီးသတ် ရေးဆွဲမယ်

0
300

မြန်မာနိုင်ငံအတွင်း ကျေးလက်လမ်းတွေ ဖွံ့ဖြိုးဖို့နဲ့ လမ်းပန်းဆက်သွယ်ရေး ကောင်းမွန်လာနိုင်ဖို့ ကျေးလက်လမ်းများ ဖွံ့ဖြိုးရေးဆိုင်ရာ မဟာဗျူဟာနဲ့ ရင်းနှီးမြှုပ်နှံမှု အစီအစဉ်ကို ၂၀၁၇ ခုနှစ် မတ်လမှာ အပြီးရေးဆွဲသွားမှာ ဖြစ်ပါတယ်။

ဇန်နဝါရီလ ၂၅ ရက်နေ့ နံနက် ၉ နာရီက ပဲခူးမြို့၊ ရွှေဝါထွန်းဟိုတယ်မှာ လုပ်တဲ့ ကျေးလက်လမ်းများ ဖွံ့ဖြိုးရေးဆိုင်ရာ မဟာဗျူဟာ(မူကြမ်း) အကြံဉာဏ်ရယူခြင်း အလုပ်ရုံဆွေးနွေးပွဲမှာ ကျေးလက်ဒေသ ဦးစီးဌာနက အဲဒီလို ပြောကြားခဲ့တာပါ။

အဲဒီအလုပ်ရုံ ဆွေးနွေးပွဲကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနတို့က ကြီးမှူးပြီး ကျင်းပခဲ့တာ ဖြစ်ပါတယ်။

မြန်မာနိုင်ငံမှာ ရှိတဲ့ ကျေးရွာ ၈၀ ရာခိုင်နှုန်းနဲ့ ကျေးလက်လူဦးရေ ၉၀ ရာခိုင်နှုန်းအတွက် ၂၀၃၀ ပြည့်နှစ်မှာ ရာသီမရွေးသွားလာနိုင်တဲ့ ကျေးလက်လမ်းတွေ ဖောက်လုပ်ဆက်သွယ်ပေးနိုင်ဖို့အတွက် ကျေးလက်လမ်းများ ဖွံ့ဖြိုးရေးဆိုင်ရာ မဟာဗျူဟာ(မူကြမ်း)ကို ရေးဆွဲထားတာလို့ အဲဒီပွဲမှာ ပြောဆိုခဲ့ပါတယ်။

ကျေးလက်လမ်းများ ဖွံ့ဖြိုးရေးဆိုင်ရာ မဟာဗျူဟာ(မူကြမ်း)မှာ ကျေးလက်လမ်းတွေရဲ့ စံနှုန်းသတ်မှတ်ချက်တွေ၊ ကျေးလက်လမ်းနဲ့ တံတားတွေ၊ ကျေးလက်ဒေသ ဆက်သွယ်ရေးအခြေအနေ၊ အဓိက ကျေးရွာချင်းဆက်လမ်းတွေ၊ ရင်းနှီးမြှုပ်နှံမှုလိုအပ်ချက်တွေ၊ ပြင်ဆင်ထိန်းသိမ်းမှု၊ ရံပုံငွေ ရရှိမှု၊ စီမံကိန်းရေးဆွဲမှုနဲ့ ဦးစားပေးအဆင့် ရွေးချယ်မှု၊ အသုံးစရိတ် ခွဲဝေမှု၊ ပြန်လည်သုံးသပ်မှုနဲ့ စောင့်ကြည့်စစ်ဆေးမှု၊ အဖွဲ့အစည်းတွေရဲ့ တာဝန် စတဲ့အချက်တွေကို ထည့်သွင်းရေးဆွဲထားပါတယ်။

ဖွံ့ဖြိုးတိုးတက်တဲ့ နိုင်ငံတစ်နိုင်ငံဖြစ်ဖို့ ဦးတည်ဆောင်ရွက်နေတဲ့ နေရာမှာ အခြေခံအဆောက်အအုံဖြစ်တဲ့ လမ်းနဲ့တံတား ဖွံ့ဖြိုးတိုးတက်ရေးဟာ အရေးကြီးတဲံအချက်တစ်ခုအနေနဲ့ ပါဝင်ပြီး ပဲခူးတိုင်းဒေသကြီးအနေနဲ့လည်း ကျေးရွာချင်းဆက်သွယ်တဲ့ လမ်းတွေ၊ မြို့နဲ့ ကျေးရွာဆက်တဲ့ လမ်းတွေ လိုအပ်သလောက် မရှိသေးတာကြောင့် ဖောက်လုပ်ဖို့ အများအပြား လိုအပ်ပြီး ရာသီမရွေးသွားလာနိုင်တဲ့ လမ်းတွေဖြစ်လာအောင် အဆင့်မြှင့်တင်ဖို့လည်း လိုအပ်တယ်လို့ ပဲခူးတိုင်းဒေသကြီး ဝန်ကြီးချုပ်က အဲဒီအခမ်းအနားမှာ အမှာစကားပြောကြားခဲ့ပါတယ်။

အဲဒီ အလုပ်ရုံဆွေးနွေးပွဲကို ပဲခူးတိုင်းဒေသကြီး ဝန်ကြီးချုပ် ဦးဝင်းသိန်းနဲ့ အစိုးရအဖွဲ့ဝင် ဝန်ကြီးတွေ၊ ဥပဒေချုပ်၊ စာရင်းစစ်ချုပ်နဲ့ လွှတ်တော်ကိုယ်စားလှယ်တွေ၊ အစိုးရအဖွဲ့ အတွင်းရေးမှူးနဲ့ ခရိုင်၊ မြို့နယ် ဌာနဆိုင်ရာ ပုဂ္ဂိုလ်တွေ၊ ကျေးလက်ဒေသဖွံ့ဖြိုးတိုးတက်ရေး ဦးစီးဌာနရုံးချုပ်နဲ့ တိုင်းခရိုင် မြို့နယ် တာဝန်ရှိသူတွေ၊ ကုမ္ပဏီတွေ၊ ပြည်သူတွေနဲ့ သတင်းမီဒီယာတွေ တက်ရောက်ခဲ့ကြပါတယ်။

ဖြိုးကိုလင်း(ညောင်ဝိုင်း)

COVID-19 Dashboard by the Center for Systems Science and Engineering (CSSE) at Johns Hopkins University (JHU)