သတင်းရယူခွင့်ကို တားမြစ်ခဲ့တဲ့ မျိုးချစ်မြန်မာရဟန်းတော်များသမဂ္ဂရဲ့ လုပ်ရပ် MCN ရှုတ်ချ

0
371

မျိုးချစ်မြန်မာရဟန်းတော်များသမဂ္ဂမှ သံဃာအချို့နှင့် လူပုဂ္ဂိုလ်အချို့က လွတ်လပ်စွာ သတင်းရယူခွင့်အား တားမြစ်ခဲ့သည့်အပေါ် ရှုတ်ချကြောင်း MCN TV NEWS (Myanmar Cable News) (မြန်မာကေ ဘယ်လ်ရုပ်သံသတင်းဌာန) က ကြေညာချက် ထုတ်ပြန်လိုက်ပါတယ်။

၂၀၁၆ ခုနှစ်၊ မေလ ၂၆ ရက်က ဆီဒိုးနားဟိုတယ်က ဟိုတယ်ဝန်ထမ်းတွေ ရိုးရာယဉ်ကျေးမှုဝတ်စုံ ဝတ်ဆင် ဧည့်ကြိုမှုပြုတဲ့ အပေါ် မျိုးချစ်မြန်မာရဟန်းတော်များ သမဂ္ဂက သံဃာအချို့နဲ့ ဆီဒိုးနားဟိုတယ်က တာဝန်ရှိသူတွေ ဆွေးနွေးမှု ပြုလုပ်နေတဲ့ သတင်းရယူနေတဲ့ MCN TV NEWS သတင်းထောက် နေမင်းခကို သတင်းရယူခွင့် ပိတ်ပင်လျှက် ခြိမ်းခြောက်မှုပြုကာ ဗွီဒီယို ကင်မရာကို လုယူပြီး မှတ်တမ်းဗွီဒီယိုဖိုင်တွေကို ဖျက်ဆီးပစ်ရန် ကြိုးစားခဲ့ကြတဲ့အပေါ် အယ်ဒီတာအဖွဲ့ ဆုံးဖြတ်ချက်အရ အဲ့ဒီလို ထုတ်ပြန်လိုက်တာပါ။

အဲ့ဒီကြေညာချက်မှာပဲ ဒီလိုလွတ်လပ်စွာ သတင်းရယူခွင့် ဟန့်တားခံရတဲ့အပေါ် ၂၀၀၈ ဖွဲ့စည်းပုံအခြေခံဥပဒေ အခန်း (၈) နိုင်ငံသား၊ နိုင်ငံသားများ၏ မူလအခွင့်အရေးနှင့် တာဝန်များ၊ ပုဒ်မ ၃၅၄ နှင့်အတူ ၂၀၁၄ သတင်းမီဒီယာဥပဒေ အခန်း (၃) သတင်းမီဒီယာသမားများ၏ ရပိုင်ခွင့်စတဲ့ ဥပဒေပုဒ်မတွေနဲ့အညီ ဥပဒေရဲ့ အကာအကွယ်ကို ရယူသွားမယ်လို့လည်း ဖော်ပြလာတာပါ။

 

ကြေညာချက်အပြည့်အစုံ


 

မျိုးချစ်မြန်မာရဟန်းတော်များသမဂ္ဂမှ လွတ်လပ်စွာ သတင်းရယူခွင့်အား တားမြစ်ခဲ့သည့်အပေါ် ရှုတ်ချကြောင်းနှင့် ၎င်းဖြစ်စဉ်အပေါ် ဥပဒေအရအကာအကွယ်ယူသွားမည်ဖြစ်ကြောင်း ကြေညာချက် ထုတ်ပြန်ခြင်း

မြန်မာ့ သတင်းမီဒီယာများအနေဖြင့် စစ်အစိုးရအဆက်ဆက် လက်ထက်များမှစတင်ကာ လွတ်လပ်စွာ သတင်းရယူခွင့်၊ လွတ်လပ်စွာ သတင်းထုတ်ပြန်ခွင့်များအတွက် တိုက်ပွဲဝင်လျှက် တိကျမှန်ကန်သည့်၊ ဘက်လိုက်မှုကင်းသည့် လူကြီးလူကောင်းဆန်သည့် သတင်းများအား ထုတ်ပြန်လျှက်   ပြည်သူများအား အလုပ် အကျွေးပြုခဲ့ကြသည်။

၂၀၁၀ ရွေးကောက်အပြီးနောက်ပိုင်း နိုင်ငံတော်သမ္မတ ဦးသိန်းစိန် လက်ထက်မှသည် ၂၀၁၅ ရွေးကောက်ပွဲအပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် နိုင်ငံတော်သမ္မတ ဦးထင်ကျော် လက်ထက်တိုင် လွတ်လပ်စွာ သတင်းရယူခွင့်၊ လွတ်လပ်စွာ သတင်းထုတ်ပြန်ခွင့်များ ရရှိရန် အုပ်ချုပ်ရေး၊ ဥပဒေပြုရေး၊ တရားစီရင်ရေးမဏ္ဍိုင်များအား အပြန်အလှန် ထိန်းညှိနိုင်ရန်တို့အတွက် ပြည်ထောင်စု အစိုးရအဖွဲ့ အပါဝင် အုပ်ချုပ်ရေးအဖွဲ့အစည်းများ၊ ဥပဒေပြုလွှတ်တော်များနှင့် ပြည်ထောင်စု တရားလွှတ်တော်ချုပ်အပါအ၀င် တရားရေးရာအဖွဲ့အစည်းများနှင့် ပူးပေါင်းလျှက် တိုင်းပြည်၏ ဒီမိုကရေစီအဆင့်အတန်း မြှင့်တင်ရေးနှင့် ပြည်သူများအတွက် သတင်းအချက်အလက်များ ရယူပေးပို့နိုင်ရေးများအတွက် အပြန်အလှန် ပူးပေါင်းဆောင်ရွက် လျှက်ရှိသည်။

ထိုသို့သော အခြေအနေတွင်  ရန်ကုန်မြို့၊ ဆီဒိုးနားဟိုတယ်၌ ဟိုတယ်ဝန်ထမ်းများ ရိုးရာယဉ်ကျေးမှု ဝတ်စုံ ဝတ်ဆင်လျှက် ဧည့်ကြိုမှုအပေါ် မျိုးချစ်မြန်မာရဟန်းတော်များသမဂ္ဂမှ ကန့်ကွက်မှုများ ဖြစ်ပေါ်ခဲ့သည်။ ထိုသို့ ကန့်ကွက်မှုများနှင့်ပတ်သက်ပြီး မျိုးချစ်မြန်မာရဟန်းတော်များသမဂ္ဂမှ သံဃာအချိုနှင့် ဟိုတယ်တာဝန်ရှိသူ များ ၂၀၁၆ ခုနှစ်၊ မေလ ၂၆ ရက်တွင် ဆွေးနွေးညှိနှိုင်းမှု ပြုလုပ်ခဲ့ကြသည်။ ထိုသို့ ဆွေးနွေးမည့် သတင်းအား ရယူ သတင်းထုတ်လွှင့်နိုင်ရန် MCN TV NEWS (Myanmar Cable News) (မြန်မာကေဘယ်လ် ရုပ်သံသတင်းဌာန) မှ အလုပ်သင်သတင်းထောက် နေမင်းခ အား သတင်းခန်းအစည်းအဝေး ဆုံးဖြတ်ချက်အရ အယ်ဒီတာအဖွဲ့မှ တာဝန်ပေးအပ်ခဲ့သည်။ MCN သတင်းထောက် နေမင်းခအနေနှင့် ၎င်းသတင်းအား ရယူနေစဉ် မျိုးချစ်မြန်မာရဟန်းတော်များသမဂ္ဂမှ သံဃာအချို့နှင့် လူပုဂ္ဂိုလ်အချို့က သတင်းရယူခွင့်အား ပိတ်ပင်လျှက် ခြိမ်းခြောက်မှုပြုကာ ဗွီဒီယို ကင်မရာအား လုယူပြီး မှတ်တမ်းဗွီဒီယိုဖိုင်များ ဖျက်ဆီးပစ်ရန် ကြိုးစားမှုပြုလျှက် လွတ်လပ်စွာ သတင်းရယူခွင့်၊ လွတ်လပ်စွာ သတင်းထုတ်ပြန်ခွင့်များအား တားမြစ်မှု ဖြစ်ပေါ်ခဲ့သည်။

ထိုကဲ့သို့ မျိုးချစ်မြန်မာရဟန်းတော်များသမဂ္ဂမှ သံဃာအချို့ နှင့် လူပုဂ္ဂိုလ်အချို့က လွတ်လပ်စွာ သတင်းရယူခွင့်၊ လွတ်လပ်စွာ သတင်းထုတ်ပြန်ခွင့်များအား တားမြစ်ခဲ့သည့်အပေါ် MCN TV NEWS (Myanmar Cable News) (မြန်မာကေဘယ်လ်ရုပ်သံသတင်းဌာန) အယ်ဒီတာအဖွဲ့ ဆုံးဖြတ်ချက်အရ ရှုတ်ချကြောင်းနှင့် ထိုဖြစ်စဉ် အပေါ် ၂၀၀၈ ဖွဲ့စည်းပုံအခြေခံဥပဒေ အခန်း (၈) နိုင်ငံသား၊ နိုင်ငံသားများ၏ မူလအခွင့်အရေးနှင့် တာဝန်များ၊ ပုဒ်မ ၃၅၄ နှင့်အတူ ၂၀၁၄ သတင်းမီဒီယာဥပဒေ အခန်း (၃) သတင်းမီဒီယာသမားများ၏ ရပိုင်ခွင့်စသည့် ဥပဒေပါ ပြဌာန်းချက်များနှင့်အညီ ဥပဒေ၏ အကာအကွယ်အား ရယူသွားမည် ဖြစ်ပါကြောင်း ကြေညာ လိုက်သည်။

ထို့အပြင် မျိုးချစ်မြန်မာရဟန်းတော်များသမဂ္ဂမှ သံဃာအချို့နှင့် လူပုဂ္ဂိုလ်အချို့မှ လွတ်လပ်စွာ သတင်းရ ယူခွင့်၊ လွတ်လပ်စွာ သတင်းထုတ်ပြန်ခွင့်များအား တားမြစ်ခဲ့သည့်အပေါ် နိုင်ငံတော်အတိုင်ပင်ခံပုဂ္ဂိုလ်ရုံး၊ နိုင်ငံတော် သမ္မတရုံး၊ သာသနာရေးဝန်ကြီးဌာန၊ နိုင်ငံတော်သံဃမဟာနာယကအဖွဲ့နှင့် သတင်းမီဒီယာကောင်စီ တို့မှ ဖြေရှင်းပေးပါရန် တောင်းဆိုလိုက်သည်။

အံ့ဘုန်းမြတ်

အယ်ဒီတာချုပ်

MCN TV NEWS

(Myanmar Cable News)

(မြန်မာကေဘယ်လ်ရုပ်သံသတင်းဌာန)

မိတ္တူ

(က) နိုင်ငံတော် သမ္မတရုံး

(ခ) နိုင်ငံတော်အတိုင်ပင်ခံပုဂ္ဂိုလ်ရုံး

(ဂ) သာသနာရေးဝန်ကြီးဌာန

(ဃ) နိုင်ငံတော်သံဃမဟာနာယကအဖွဲ့

(င) သတင်း မီဒီယာကောင်စီ

ABOUT MABATHA FINAL_1

ABOUT MABATHA FINAL_2

 

 




COVID-19 Dashboard by the Center for Systems Science and Engineering (CSSE) at Johns Hopkins University (JHU)