ကောင်းမွန်သော ပညာရေး ပတ်ဝန်းကျင် ဖြစ်စေရန် (ဆောင်းပါး)

0
432

education

နှစ်ပေါင်းများစွာ စစ်အုပ်ချုပ်ရေးစနစ်အောက်တွင် မလှုပ်သာ၊ မလွန့်သာ ရှိခဲ့သော ပညာရေးစနစ်ရဲ့ အားနည်းချက် ချွတ်ခြုံကျမ များ သည် ယခုနည်းပညာတဟုန်ထိုး တိုးတက်ဖွံဖြိုးလာသောခေတ်တွင် သိသာထင်ရှားစေသော နိုင်ငံ၏အားနည်းချက်များပင် ဖြစ်လို့လာ သည်။ ပညာရေး ပြုပြင်ပြောင်းလဲရန် နိုင်ငံသားအားလုံးက ဆန္ဒရှိနေကြသည်။ သို့သော် ထိုကဲ့သို့ ပညာရေးပြုပြင်ပြောင်းလဲရေးသည် နိုင်ငံသူ၊ နိုင်ငံသားများအားလုံး၏ ရင်ထဲတွင် ကိန်အောင်းနေရာယူလျက်ရှိသော ကျင့်ဝတ်ဆိုင်ရာ ခံယူချက်များ၊ စံနှုန်းများ ပြုပြင် ပြောင်းလဲရေးနှင့်လည်း ဆက်စပ်လျှက်ရှိနေသည်ကို သတိပြုသင့်ပါသည်။

အဘယ်ကြောင့်ဆိုသော် နှစ်ပေါင်း ၅၀ ကျော်မျှ ခေတ်အဆက်ဆက်က ကျင့်သုံးခဲ့သော လူမှုပတ်ဝန်းကျင်၏ စနစ်ဆိုး၊ အကျင့်ပျက် များ၏ ရိုက်ခတ်မှုများသည် နိုင်ငံ၏ဖွံ့ဖြိုးရေးတွင် အဓိကမောင်းတံများဖြစ်သည့် ကျောင်းသား၊ ကျောင်းသူနှင့် ဆရာ၊ ဆရာမများ ထံ တွင် ကိန်းအောင်းလျက်ရှိကာ ထိုအကျင့်ပျက်ချစားမှု များအားလုံးကို ဖယ်ထုတ်နိုင်မှသာလျှင် ကောင်းမွန်သော ပညာရေး ပတ်ဝန်းကျင် တစ်ခုကို တည်ထောင်နိုင်မည် ဖြစ်ပေသည်။

ကောင်းမွန်သေ ပညာရေးပတ်ဝန်းကျင် ဖြစ်ပေါ်လာစေရေးသည် ယခုအချိန်တွင် အရေးကြီးသော အချက်တစ်ချက်ပင် ဖြစ်သည်။ ထိုကဲ့သို့ ကောင်းမွန်သော ပညာရေးပတ်ဝန်းကျင် ဖြစ်ပေါ်လာစေရန် အတွက် ကျောင်းသားမိဘများ၊ ကျောင်းသူ၊ ကျောင်းသားများနှင့် ဆရာ၊ ဆရာမ သုံးပွင့်ဆိုင် ရင်ဆိုင်ဖြေရှင်းရမည့် လက်တွေ့ကြသော အချက်ပင် ဖြစ်ပေသည်။

ကျောင်းသားမိဘများ

မိမိ သား၊ သမီးကို ပညာတော်သော သားသမီးများဖြစ်စေလိုသည်မှာ မိဘတိုင်း၏ ဆန္ဒပင်ဖြစ်သည်။ ထိုဆန္ဒကပင် ကောင်းမွန်သော ပညာရေးဝန်းကျင်တစ်ခုကို ဖျက်စီးစေနိုင်သည်ဆိုသည်ကို မိဘများ သတိချပ်သင့်ပါသည်။ ဒါ့အပြင် မိမိသားသမီးများရဲ့ ဆန္ဒကို အဓိကထား လေးစားသင့်ပါသည်။ မိဘများအနေနဲ့ သား၊ သမီးများကို မိမိပုံဖော်လိုသော ဘ၀တစ်ခုကို ဇွတ်အတင်း ပုံမဖော်မိဖို့လည်း အရေးကြီးဆုံးသော အချက်ပင်ဖြစ်သည်။

ဒီမိုကရေစီ ပညာရေးဖြစ်စဉ် ပြောင်းလဲရန်အတွက် အရေးကြီးဆုံးသော အချက်မှာ မိဘများအနေနဲ့ သား၊ သမီးများကို အသက်အရွယ် အလိုက် သင့်တင့်သော လွတ်လပ်စွာဆုံးဖြတ်ပိုင်ခွင့် အပြည့်အ၀ပေးရေး ပင်ဖြစ်သည်။ ထိုသို့ လွတ်လပ်စွာဆုံးဖြတ်ပိုင်ခွင့်ကို ပေးပြီး နောက် ဖြစ်ပေါ်လာသော အကျိုးဆက်များရဲ့ ရလဒ်ကို တာဝန်ယူတတ်မှု၊ တာဝန်ခံတတ်မှုစတဲ့ ဓလေ့ကောင်းများ ဖြစ်ပေါ်လာစေရန် လေ့ကျင့်ပျိုးထောင်ပေးဖို့လိုအပ်ပါတယ်။ ထိုမှသာ ဘ၀အတွက် ကောင်းမွန် မှန်ကန်သော ဆုံးဖြတ်ချက်များကို မိမိကိုယ်တိုင် ဆုံးဖြတ် ချက်ချနိုင်ပြီး ထိုဆုံးဖြတ်ချက်အတွက် မိမိကိုယ်တိုင် တာဝန်ယူတတ်သော လူငယ်များပေါ်ပေါက်လာမည်ဖြစ်သည်။

ကျောင်းသား၊ ကျောင်းသူများ

နိုင်ငံတော်၏ ပညာရေး စနစ်ကို အဓိကပုံဖော်သူများမှာ ကျောင်းသား၊ ကျောင်းသူများပင်ဖြစ်ပြီး ပညာရေးစနစ်ရဲ့ ကောင်းကျိုး၊ ဆိုးမွေ ကို ခံစားရသူများမှာလည်း ကျောင်းသား၊ ကျောင်းသူများ ပင်ဖြစ်သည်။ ဒါ့အပြင် ပညာရေး စနစ်မှ ထွက်ပေါ်လာသော ကောင်းကျိုး၊ ဆိုးမွေများဖြင့် အနာဂတ် နိုင်ငံတော် တည်ဆောက်ရေးဖြစ်စဉ်တွင် အဓိကအခန်းကဏ္ဍမှ ပါဝင်လှုပ်ရှားကြမည့်သူများမှာလည်း ထို ကျောင်းသား၊ ကျောင်းသူများပင် ဖြစ်နေသည့်အတွက် ကောင်းမွန်သည့် ပညာရေးပတ်ဝန်းကျင် ဖြစ်ပေါ်ဖို့ နိုင်ငံတိုင်းတွင် လိုအပ်ပါ သည်။

ကျောင်းသား၊ ကျောင်းသူများအနေနဲ့ အမြဲစူးစမ်းလေ့လာလိုစိတ်အပါအ၀င် မိမိသင်ယူထားသည့် ပညာရပ်များကို မိမိတို့၏လက်တွေ့ ကိစ္စရပ်များတွင် ပြန်လည်အသုံးပြုနိုင်ရန်အထိ စဉ်းစားတွေးခေါ်သည့် အလေ့အကျင့်ကောင်းများကို ပြုလုပ်ကြဖို့ လိုအပ်လှပါသည်။ ထို့ပြင် မိဘများရဲ့ စိတ်ကူးအိမ်မက်များကို အကောင်အထည်ဖော် တည်ဆောက်ခြင်းထက် မိမိရဲ့ ၀ါသနာကို အကောင်အထည်ဖော် လိုတဲ့ စိတ်ကူး အိမ်မက်တွေ ရှိနေဖို့လည်း အရေးကြီးပါသည်။

ယနေ့ နည်းပညာတိုးတက်နေသောခေတ်တွင် အစဉ်အမြဲပြောင်းလဲနေသော ဆိုရှယ်မီဒီယာများတွင် သာယာမနေဘဲ မိမိတို့၏ ယဉ်ကျေးမှု ဓလေ့စရိုက်များကို ဘိုးဘွားမိဘများနှင့် ဆရာသမားထံတွင် လေ့လာဆည်းပူးပြီး မိမိတို့ ယဉ်ကျေးမှုတွင် ရှိနေပြီးသော တန်ဖိုးမဖြတ်နိုင်သော ယဉ်ကျေးမှုတန်ဖိုးများကို တတ်မြောက်ထားသော ခေတ်ပညာများနှင့် ပေါင်းစပ်ပြီး လက်တွေ့နယ်ပယ်တွင် ပြန်လည်အသုံးချနိုင်ရန် ကြိုးစားကြဖို့ လိုအပ်လှပါသည်။

ဆရာ၊ ဆရာမများ

အနာဂတ်ကို ပုံဖော်ကြမည့် လူငယ်များကို ကြားမြင်ဗဟုသုတ သင်ကြားပေးရသည့် ဆရာ၊ ဆရာမများရဲ့ လက်ထဲတွင် လူငယ်ပေါင်း များစွာရဲ့ ဘ၀ပေါင်းစွာ ရှိနေပါသည်။ ထို့အတွက်ကြောင့် ဆရာ၊ ဆရာမများဟာ ကောင်းမွန်တဲ့ ပညာရေးပတ်ဝန်းကျင်တစ်ခု တည်ဆောက်ရေးတွင် အရေးကြီးဆုံး နေရာတွင် ရှိနေသည်ကို အထူးသတိချပ်သင့်ပါသည်။

ထို့အတွက်ကြောင့် ကျောင်းသား၊ ကျောင်းသူများကို စာတွေ့သင်ကြား ပို့ချနေခြင်းထက် သင်ကြား လိုက်သော ပညာရပ်ဆိုင်ရာ ကိစ္စရပ်များကို လက်တွေ့နယ်ပယ်တွင် မည်သို့မည်ပုံ အသုံးချရမည်ဆိုတဲ့ လက်တွေ့နဲ့ သက်ဆိုင်သော တွေးခေါ်စဉ်းစားမှုမျိုးများကို လေ့ကျင့်သင်ကြားပေးရန် လိုအပ်ပါသည်။ ထို့အတွက် ဆရာ၊ ဆရာမများ အနေနဲ့ တိုးတက် ပြောင်းလဲနေသော ခေတ်နဲ့အညီ သင်ကြား ရေး စနစ်သစ်များ ကိုလည်း မျက်ခြေမပျက် လေ့လာနေရမည်ဖြစ်သည်။

ဆရာ၊ ဆရာမများအနေနဲ့ ပညာရေး အစဉ်တိုးတက်မြင့်မား နေစေရန်အတွက် သုတေသန လုပ်ငန်းများကိုလည်း မျက်ခြေမပျက် လုပ်ဆောင်နေရမည်ဖြစ်သည်။ ဒါ့အပြင် မြန်မာရှေးထုံးတမ်း အစဉ်အလာအရရှိခဲ့သော ဆရာတို့၌ရှိသင့်သော ကျင့်ဝတ်များကို ခါးဝတ်ပုဆိုးကဲ့သို့ ထိန်းသိမ်းရပါ လိမ့်မည်။

အရေးအကြီးဆုံး အချက်ကတော့ ဆရာ၊ ဆရာမများဟာ ကျောင်းသားမိဘများနဲ့ ကျောင်းသားများရဲ့ အသုံးချခံမဖြစ်ဖို့ပင် ဖြစ်သည်။ ထိုကဲ့သို့ အသုံးချခံမဖြစ်ဖို့အရေးတွင် ဆရာ၊ ဆရာမများအနေနဲ့ ဘက်လိုက်မှုကင်းသော၊ အကျင့်ပျက်ချစားမှုကင်းသော ပညာရေးဝန်းကျင်ကောင်းတစ်ခုကို ပုံဖော်မည်ရမည် ဆိုတဲ့ ခိုင်မာတဲ့ ဆုံးဖြတ်ချက်ကိုယ်စီချထားဖို့လိုအပ်လှပါသည်။

နိဂုံးချုပ်အနေဖြင့် တင်ပြရလျှင် ကောင်းမွန်သော ပညာရေးပတ်ဝန်းကျင်ကောင်းတစ်ခု ဖြစ်ပေါ်စေဖို့အတွက် ကျောင်းသားမိဘ၊ ကျောင်းသား ကျောင်းသူများ၊ ဆရာ ဆရာမများအနေနဲ့ အကျင့်ဟောင်း၊ အကျင့်ပျက်များကို ပြုပြင်ပြောင်းလဲပြီး ဒီမိုကရေစီ ခေတ်နဲ့လိုက်လျှောညီထွေရှိသော ပညာရေး ၀န်းကျင်ကောင်းကို ဖန်တီးရန်လိုအပ်နေသော အချိန်ပင်ဖြစ်ပါသည်။

နန္ဒာဘုန်းမြင့်