နိုင်ငံရေးပါတီ မိတ်ဆက် (ရှမ်းတိုင်းရင်းသားများ ဒီမိုကရက်တစ်ပါတီ)

0
217

 

ရှမ်းတိုင်းရင်းသားများ ဒီမိုကရက်တစ်ပါတီ တွဲဖက်အတွင်းရေးမှူး-၁ ဦးစိုင်းအောင်မြင့်ခိုင်က ၄င်းတို့ပါတီ၏ မူဝါဒ၊ သဘောထား၊ လုပ်ငန်းစဉ်စသည်တို့ကို ဖေဖော်ဝါရီ ၃ ရက် ညပိုင်းတွင် ရေဒီယိုနှင့် ရုပ်မြင်သံကြားအစီအစဉ်များမှ ဟောပြောတင်ပြခဲ့ပါသည်။ အဆိုပါ ဟောပြောတင်ပြချက်အပြည့်အစုံမှာ အောက်ပါအတိုင်းဖြစ်ပါသည် –

မိုင်ဆွန်ခ- မင်္ဂလာပါခင်ဗျား

တိုင်းရင်းသားပြည်သူအပေါင်း မင်္ဂလာအပေါင်းနှင့် ပြည့်စုံပါစေကြောင်း ဦးစွာနှုတ်ခွန်းဆက်သအပ်ပါတယ်။ ကျွန်တော်ကတော့ ရှမ်းတိုင်းရင်းသားများ ဒီမိုကရက်တစ်ပါတီ (ခေါ်) ကျားဖြူပါတီရဲ့ တွဲဖက်အတွင်းရေးမှူး(၁) ဦးစိုင်းအောင်မြင့်ခိုင် ဖြစ်ပါတယ်။ မိမိတို့ပါတီရဲ့ ၂ဝ၁၇ ခုနှစ် ကြားဖြတ် ရွေးကောက်ပွဲဆိုင်ရာ မူဝါဒနှင့် အမြင်သဘောထားများကို တင်ပြသွား မှာဖြစ်ပါတယ်။

ကျားဖြူပါတီ(ခေါ်) ရှမ်းတိုင်းရင်းသားများ ဒီမိုကရက်တစ် ပါတီ၏ နိုင်ငံရေး ပါတီမှတ်ပုံတင်အမှတ်-(၁၅/၂ဝ၁ဝ)ဖြစ်ပြီး နိုင်ငံရေးပါတီမှတ်ပုံ တင်ခွင့်ရရှိ သည့်နေ့ရက်မှာ (၂ဝ၁ဝ ခုနှစ်၊ မေလ ၂၆ ရက်) ဖြစ်ပါတယ်။

ညီနောင်တိုင်းရင်းသားများခင်ဗျား

နိုင်ငံရေးပါတီတစ်ခုမှာ (၁)ယုံကြည်ချက်၊ (၂)ရည်ရွယ်ချက်/ ရည်မှန်းချက်၊ (၃)မူဝါဒနှင့် (၄)လုပ်ငန်းလမ်းစဉ် ရှိရပါမယ်။ ထိုယုံကြည် ချက်၊ ရည်ရွယ်ချက်၊ မူဝါဒနှင့် လုပ်ငန်းလမ်းစဉ်များ အတိုင်း ပေါက်မြောက် အောင်မြင်အောင် ဆောင် ရွက်နိုင်မှသာ နိုင်ငံနှင့် ပြည်သူအတွက် တာဝန် ကျေသော ပါတီကောင်းဖြစ် မှာ ဖြစ်ပါတယ်။

ကျားဖြူပါတီ၏ယုံကြည်ချက်မှာ

အချုပ်အားဖြင့် –

နိုင်ငံသား၊ တိုင်းရင်းသားတို့၏ အခွင့်အရေးများ တန်းတူ ညီမျှမှုဖော်ဆောင်ပေး ၍ ဖိနှိပ်ခြင်းကင်းမှသာလျှင် စစ်မှန်သော ဖက်ဒရယ် ပြည်ထောင်စုကို အမှန်တကယ်တည်ဆောက်နိုင်မည်ဟု အလေးအနက်ယုံ ကြည်ပါတယ်။ ဒီနေရာမှာ သတိထားဖို့က တန်းတူနှင့်ညီမျှမှုဆိုတာ မတူညီပါ ဘူး။ ဥပမာ- အစ်ကိုကြီးတစ်ဦးနှင့် ညီငယ်ခုနစ်ဦးတို့ အသီးရှစ်လုံးကို ခွဲဝေယူကြရာမှာ အရေအတွက် ညီမျှစွာ တစ်လုံးစီ ရနိုင်မည်ဖြစ်သော်လည်း ခွဲဝေယူသည့် ပုံစံအပေါ်မူတည်၍ အကြီး၊ အသေး၊ အကောင်း၊ အပုပ်စသည့် အရည်အသွေး တွင် တန်းတူရရှိမှုရရန် ခဲယဉ်းပါတယ်။ တန်းတူရဖို့က ခွဲဝေပေးသူရဲ့ စိတ်ဆန္ဒနှင့် လက်ခံရသူရဲ့ တောင်းဆိုမှုအပေါ်မှာ မူတည်ပါ လိမ့်မယ်။

ကျားဖြူပါတီ၏ ရည်ရွယ်ချက်နှင့်ရည်မှန်းချက်တင်ပြရရင်
အဓိက ရည်ရွယ်တာက စိတ်ကူးယဉ်မျှော်မှန်းချက်ထက် လက်တွေ့ အကျိုးရှိဖို့နှင့် ထိပ်တိုက်ရင်ဆိုင်ရေး၊ ဆန့်ကျင်ရေးကို ဦးစားမပေးဘဲ ဖက်ဒရယ်ပြည်ထောင်စုမြန်မာနိုင်ငံတည်ဆောက်နိုင်ရေးကို ရည်ရွယ်ပါတယ်။

ရည်မှန်းတာက

– ဖက်ဒရယ်ပြည်ထောင်စု တည်ဆောက်ရေး
– ဌာနေတိုင်းရင်းသားအားဖြင့် ပြည်နယ်အစိုးရဖွဲ့စည်းရေး
– မိမိတိုင်းရင်းသားမျိုးနွယ်စုတစ်စုချင်းသွေးစည်းညီညွတ်ရေးမှသည်
ပြည်ထောင်စုစည်းလုံးညီညွတ်မှု တည်ဆောက်ရေးတို့ဖြစ်ပါတယ်။

ညီနောင်တိုင်းရင်းသားတို့ခင်ဗျား

(၁) ဖက်ဒရယ်ရဲ့အဓိပ္ပာယ်က ခွဲထွက်ခြင်းမဟုတ်ပါဘူး။ ပေါင်းစည်းခြင်း သာဖြစ်ပါတယ်။

– ပြည်နယ်များက တန်းတူညီမျှမှု ရရှိဖို့လိုအပ်တဲ့ လုပ်ပိုင်ခွင့်၊ ပြဋ္ဌာန်းခွင့် အာဏာများကို ညီညီမျှမျှခွဲဝေရယူကြမယ်။

– စုပေါင်းရယူကျင့်သုံးရမယ့် လုပ်ပိုင်ခွင့်၊ ပြဋ္ဌာန်းခွင့်အာဏာများကို အားလုံးရဲ့ ကိုယ်စား ပြည်ထောင်စုအစိုးရက ရယူရပါမယ်၊ တာဝန်ယူရပါမယ်။

– ပြည်နယ်များက ရသင့်ရထိုက်တဲ့ အခွင့်အရေးများကို တန်းတူစွာနှင့် ညီမျှစွာ ခွဲပေးရပါမယ်။

– အဲဒါမှ ပြည်ထောင်စု ဖက်ဒရယ်စနစ် အစစ်အမှန်ဖြစ်ပါတယ်။
ကျွန်တော် တို့ပြောတဲ့၊ လိုလားတဲ့ ဖက်ဒရယ်ဆိုတာ ဒီပုံစံပါပဲ။

(၂) ဌာနေတိုင်းရင်းသားအားဖြင့် ပြည်နယ်အစိုးရဖွဲ့စည်းရေး ရည်မှန်း ခြင်းသည် မိမိကိုယ်ကျိုးစီးပွားအတွက် အာဏာရယူလိုခြင်း လုံးဝမဟုတ်ပါ။

မိမိတို့ဌာနေတိုင်းရင်းသားသည်သာလျှင် မိမိတို့လိုအပ်ချက်ကို မိမိ အသိဆုံး၊ တိုးတက်ဖွံ့ဖြိုးအောင်၊ ဘက်မျှအောင် ဘယ်လိုစီမံဆောင်ရွက်ရမှာကို အသိဆုံးဖြစ်ပါတယ်။ မိမိတို့လက်ထဲမှာ မိမိကံကြမ္မာကို ဖန်တီးနိုင်ခွင့်အာဏာ ရှိမှသာလျှင် မိမိတို့ဘဝကို အလှဆင်နိုင်မှာ ဖြစ်ပါတယ်။

နိုင်ငံရေးပါတီတစ်ခုအတွက် အရေးကြီးဆုံးကမိမိပါတီမူဝါဒနှင့်အညီ
နိုင်ငံ့ အရေးဆောင်ရွက်ရန်မှာ နိုင်ငံရေးအာဏာရယူနိုင်ဖို့ပဲ။
နိုင်ငံရေး အာဏာရပြီးရင် နိုင်ငံသားပြည်သူများအတွက် ကောင်း ကျိုး ဆောင်ရွက်ပေးနိုင်ဖို့ကို ရည်မှန်းချက်ကြီးကြီးထားရပါမယ်။

တချို့သောသူတို့က ရွေးကောက်ပွဲဝင်တာဟာ နိုင်ငံရေးအာဏာရယူဖို့ မဟုတ်ဘူးလို့ အသံကောင်းဟစ်ကြတယ်။ လူပြိန်းကြိုက် ကတိတွေပေးပြီး နိုင်ငံ ရေးအာဏာကိုမယူ နိုင်ငံ့အရေးစီမံခန့်ခွဲဖို့ကို နိုင်နင်းကျွမ်းကျင်စွာဖြင့် မလုပ်လို၊ မလုပ်နိုင်ရင်၊ နိုင်ငံရေးအာဏာမလိုချင်ရင် ဘာလုပ်ဖို့ ရွေးကောက်ပွဲဝင်မှာလဲ၊ ပြည်သူကို ဘယ်လိုကူညီနိုင်မှာလဲလို့ ကျွန်တော်မေးချင်ပါတယ်။ နိုင်ငံရေး အာဏာရချင်လို့ အားလုံးက ရွေးကောက် ပွဲဝင်ကြတာပဲ မဟုတ်ပါလားခင်ဗျား။

ကျွန်တော်တို့ပါတီ ကတော့ နိုင်ငံရေးအာဏာအတွက် ရွေးကောက်ပွဲ ဝင်ပါတယ်။ နိုင်ငံရေးအာဏာရမှ ကျွန်တော်တို့ ပြည်နယ်နှင့် ပြည်သူများ ဖွံ့ဖြိုးမှုအတွက် အခြေခံကျတဲ့ လမ်းတံတားစီမံကိန်းများ၊ အလုပ်အကိုင် အခွင့်အလမ်းစီမံကိန်းများ၊ စီးပွားရေးစီမံကိန်းများ၊ လူမှုဘဝဖွံ့ဖြိုးရေးစီမံကိန်း များကို ဆောင်ရွက်နိုင်မှာဖြစ်ပါတယ်။

ညီနောင်တိုင်းရင်းသားများခင်ဗျား

(၃) ကျွန်တော်တို့နိုင်ငံဟာ တိုင်းရင်းသားမျိုးနွယ်စုများစွာ စုစည်း နေထိုင်တဲ့နိုင်ငံပါ။ တိုင်းရင်းသားမျိုးနွယ်စုကြီးများရော မျိုးနွယ်စုငယ်များပါ တစ်နိုင်ငံလုံးပြန့်ကျဲနေထိုင်နေကြပါတယ်။ ဒီမျိုးနွယ်စုများဟာ မိမိတို့ တစ်စုချင်းအလိုက် စုစည်းညီညွတ်မှု ကနေ ပြည်ထောင်စုတိုင်းရင်းသားများ စည်းလုံးညီညွတ်မှုကို ဖော်ဆောင် ကြရမှာဖြစ်ပါတယ်။

တိုင်းရင်းသားလူမျိုးများ အခြေ ပြုနိုင်ငံရေးပါတီများက မိမိမျိုးနွယ်စု စည်းလုံးညီညွတ်မှုကို ဖော်ဆောင်မှသာ ပြည်ထောင်စုစည်းလုံးမှုကို အထောက်အကူပြုနိုင်မှာဖြစ်ပါတယ်။ ဒါ့အပြင် မည်သည့်တိုင်းရင်းသားမဆို မိမိနေထိုင်နေတဲ့ နယ်မြေဒေသက တိုင်းရင်းသားမျိုးနွယ်စုများနဲ့ သဟ ဇာတဖြစ်မှု၊ မိမိရှင်သန်မှု၊ အသက်မွေးမှုကို ထောက်ကူပေးနေတဲ့ နယ်မြေဒေသ ကျေးဇူးတရားကို နားလည်ခံစား သိတတ်မှသာလျှင် မိမိတို့လိုချင်တဲ့ ဖက်ဒရယ်ဒီမိုကရေစီနိုင်ငံ ပေါ်ပေါက်လာနိုင်မှာဖြစ်ပါတယ်။
ဒါကြောင့် ကျွန်တော်တို့အားလုံးဟာ ဒီမြေမှာနေ၊ ဒီရေကိုသောက်၊ ဒီဒေသမှာ ကိုယ့်ဘဝကို တည်ဆောက်ကြတဲ့သူများဖြစ်လို့ မိမိတို့ဌာနေ တိုင်းရင်းသားတွေရဲ့ နိုင်ငံ့အရေးဆောင်ရွက်မှုမှာ ကျားဖြူပါတီနှင့်အတူ ပါဝင်အားပေးပါလို့ တိုက်တွန်းလိုပါတယ်။

ညီနောင်တိုင်းရင်းသားများခင်ဗျား

ကျွန်တော်တို့ လိုလားတောင့်တတဲ့ ဖက်ဒရယ်ဒီမိုကရေစီနိုင်ငံကို သွားတဲ့လမ်းမှာ ၂ဝ၁၇ ခုနှစ် ကြားဖြတ်ရွေးကောက်ပွဲဟာ ကျော်ဖြတ်ရမယ့် တံခါးတစ်ချပ်ဖြစ်ပါတယ်။ ဒီတံခါးကို ကျော်ဖြတ်သွားနိုင်ဖို့က လူထုရဲ့ ထောက်ခံမှုမဲပြားများ လိုအပ်ပါတယ်။ လူထုက မှန်မှန်ကန်ကန် မဲပေးပါမှ၊ ကိုယ့်ကို ကိုယ်စားပြုမယ့် ကိုယ်စားလှယ်နဲ့ပါတီကို မှန်မှန်ကန်ကန်ရွေးပေးပါမှ လိုရာပန်းတိုင်ကို အရောက်လှမ်းနိုင်မှာဖြစ်ပါတယ်။
မိမိရွေးချယ်မဲပေးလိုသူ ကိုယ်စားလှယ်လောင်းရဲ့ ပါတီအမှတ်တံဆိပ် ဘေးက အကွက်ထဲမှာ တံဆိပ်တုံးတိတိကျကျ ရိုက်ပေးပါလို့ တိုက်တွန်း လိုပါတယ်။

ညီနောင်တိုင်းရင်းသားများခင်ဗျား

နောက်ဆုံးအနေနဲ့ ပြောကြားချင်တာကတော့-
ကျွန်တော်တို့ အားလုံးဟာ ဒီမြေမှာနေ၊ ဒီရေကိုသောက်၊ ဒီဒေသမှာ ကိုယ့်ဘဝကို တည်ဆောက်ကြတဲ့သူများပီပီ ဒို့ရှမ်းပြည်နယ် ဌာနေတိုင်းရင်း သားတို့ရဲ့ နိုင်ငံ့အရေးဆောင်ရွက်မှုမှာ မှန်ကန်စွာရွေးချယ်မဲပေးခြင်းဖြင့် အမိမြေကျေးဇူးကို ဆပ်ကြပါစို့လို့ တိုက်တွန်းလိုပါတယ်။

ရှမ်းတိုင်းရင်းသားများ ဒီမိုကရက်တစ်ပါတီ(ကျားဖြူပါတီ)ကတော့
အကောင်းဘက်သို့ ပြောင်းလဲဖို့
မိမိယုံကြည်ချက်ကို အရင်းတည်၍
ပြည်ထောင်စု ဘဝသစ်တည်ဆောက်ရန်
မြဲမြံသော အဓိဋ္ဌာန်ပြုလျက် ရှေ့သို့ချီတက်မည်ဖြစ်ပါကြောင်း တင်ပြရင်း နိဂုံးချုပ်အပ်ပါတယ်ခင်ဗျား။