တပ်မတော်ဟာ တစ်ခုတည်းရှိတယ်လို့ ဗိုလ်ချုပ်မှူးကြီး မင်းအောင်လှိုင် ပြောကြား

လက်နက်ကိုင် လမ်းစဉ်မှသည် ငြိမ်းချမ်းရေး၊ ငြိမ်းချမ်းရေးမှသည် ဖက်ဒရယ်စနစ်ကိုအခြေခံတဲ့ စစ်မှန်တဲ့ ဒီမိုကရေစီ ပြည်ထောင်စုဖြစ်ဖို့ လမ်းခင်းပေးထားတာဖြစ်တယ်လို့ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါတယ်။

15219541_1402739456427205_8328270742074648592_n

ဒီဇင်ဘာလ ၂ ရက်နေ့ ဒီကနေ့မှာ စစ်တက္ကသိုလ်ဗိုလ်လောင်းသင်တန်းအမှတ်စဉ်(၅၈)သင်တန်းဆင်းဂုဏ်ပြုစစ်ရေးပြ အခမ်းအနားမှာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မဟာသရေစည်သူ မင်းအောင်လှိုင်က အခုလိုပြောကြားလိုက်တာပါ။

ဒါ့အပြင်တပ်မတော်အနေနဲ့ ငြိမ်း ချမ်းရေးနဲ့ ပတ်သက်တဲ့မူဝါဒ(၆)ရပ် ကိုချမှတ်ပြီး စစ်မှန်ခိုင်မြဲတဲ့ ငြိမ်းချမ်းရေးရရှိဖို့ ခိုင်ခိုင်မာမာ ရပ်တည်ဆောင်ရွက် လျက်ရှိပြီး၊ ငြိမ်းချမ်းရေး လုပ်ငန်းစဉ်(Peace Process)ကို ဆောင်ရွက်တဲ့အခါမှာ NCA စာချုပ်ပါ အတိုင်း လိုက်နာဆောင်ရွက်ဖို့လိုသလို ငြိမ်းချမ်းရေးနဲ့ပတ်သက်တဲ့မူဝါဒ(၆)ရပ်ကို လည်းလေးစား လိုက်နာမှ NCA လမ်းကြောင်းကို မြန်မြန်ဆန်ဆန်နဲ့ အဆင်ပြေပြေ ဆောင်ရွက်နိုင်မှာဖြစ်တယ်လို့ ပြောကြားပါတယ်။

မြန်မာနိုင်ငံဟာ တိုင်းရင်းသားပေါင်းစုံနေထိုင်ကြပြီး နိုင်ငံတော်ကာကွယ်ရေးတာဝန်ထမ်းဆောင်ချင်ရင် ဘယ်တိုင်းရင်းသားမဆို စစ်မှုထမ်းစည်းမျဉ်းတွေနဲ့အညီ တပ်မတော်မှာတာဝန်ထမ်းဆောင်ခွင့်ရှိပြီး နိုင်ငံတကာနဲ့ နိုင်ငံတိုင်းမှာ တပ်မတော်ဆိုတာတစ်ခုပဲရှိတယ်လို့ပြောကြားပါတယ်၊